Goldfinger (títol orichinal, enguerada en Aragón con o títol de James Bond contra Goldfinger) ye una cinta de cine d'espionache de l'anyo 1964 coproducida por o cine estausunidense y lo cine britanico dirichida por Guy Hamilton seguntes un guión adaptau por Richard Maibaum y Paul Dehn (basau en Goldfinger, una novela publicada por Ian Fleming l'anyo 1959), con una banda sonora orichinal de John Barry, una dirección de fotografía de Ted Moore y una producción cinematografica de Harry Saltzman y Albert R. Broccoli ta la productora cinematografica Eon Productions. Conta con un elenco d'actors, en os suyos papels principals, formau por Sean Connery, Honor Blackman, Gert Fröbe, Shirley Eaton, Tania Mallet, Harold Sakata, Bernard Lee, Martin Benson, Cec Linder, Austin Willis, Lois Maxwell y Bill Nagy.
Auric Goldfinger ye un traficant d'oro que ha planificau atacar o Deposito de Metals Preciosos d'os Estaus Unius en Fort Knox (Kentucky) contaminando-lo ta que no se i pueda dentrar y asinas puye espectacularment a valura d'os suyos propios stocks d'oro. James Bod ha estau treballando ta destruyir un laboratorio clandestino de drogas y agora li encomanan vichilar a Goldfinger en Miami. En primeras, evita que time a un chugador de cartas, pero dimpués l'ataca l'esbirro de Golfindger, que asasina a una muller que treballaba ta él pero que ha colaborau con Bond. Finalment, Goldfinger fa una alianza con a Mafia (encara que dimpués mata a los mafiosos) y con o Gubierno de China. Bond ha d'esbaratar toz ixos plans.
A cinta s'ambienta en a suya epoca actual (1964) en America d'o Sud, Miami (Florida) y Fort Knox (Kentucky) en Estaus Unius y en Suiza y las suyas escenas se filmoron en os Pinewood Studios en Buckinghamshire, en localidaz de Surrey y Hertfordshire y en Londres en o Reino Uniu, en Fort Knox, Louisville y bella atra localidat en Kentucky y en Miami y bella atra localidat en Florida en os Estaus Unius y en Andermatt en o cantón d'Uri en Suiza.[2]
Ye una cinta con cuantos premios y nominacions recibidas, en podendo-se destacar un Premio Oscar en a suya 37ena edición (convertendo-se en a primer cinta de James Bond en recibir-ne uno) y una atra nominación en os Premios BAFTA en a suya 18ena edición.